Odia Poetry by Snehalata Biswal,Abdalpur,Jajpur,Odisha,India

 ମନଚୁଲି

ମନର ଚୁଲିରେ ମୋର ହାଣ୍ଡିଏ ଅନ୍ଧାର,

ଖଣ୍ଡିଏ ପୁଣ୍ୟର ରନ୍ଧାବଢା ନିତି ମୋର ।

ଗିନାଏ ଗ୍ଲାନି ପୁଣି ଧାପେ ଧାର ଉଧାର,

ଚିମୁଟେ ଆଶାର ଲୁଣେ ଚଳେ ପରିବାର ।

କିଆରିଏ ବିଶ୍ଵାସରେ କେନାଏ ନିଃଶ୍ୱାସ,

ଚେନାଏ ଚାନ୍ଦର ଛାଇ ବେଲାଏ ବିଶ୍ୱାସ।

ଗୋଟିଏ ନିଆରା ଶବ୍ଦ କୋଟିଏ ଅମୃତ, 

କାନିରେ ବାନ୍ଧିଛି ଯେତେ ସୁନେଲି ଅତୀତ। 

ରେଖାଏ ଦେଖାରେ ପୁରିଯାଏ ସେରମାଣ,

ମମତାର ମସଲାରେ ରାନ୍ଧେ ମୁଁ ତିଅଣ। 

କର୍ଚୁଲିଏ କଳପନା ବାଢେ ଦେଇ ମନ, 

ଅଣ୍ଟିର ଗଣ୍ଠିରେ ଗଣ୍ଠିଲିଏ ମୋ ସପନ।

କାଣିଚାଏ ହସପୁଣି ପାଣିଚିଆ ବେଶ, 

ଦୁଇବିଶ୍ଵା ଜମିରେ ମୋ ବସ୍ତାଏ ବତାସ

ମୁଠାଏ ଆଶାରେ ମୋର ଦି'ମୁଠା ନିରାଶା, 

ଆଞ୍ଜୁଳାଏ  ସ୍ନେହ ଶ୍ରଦ୍ଧା ଟିକେ ରାଗଋଷା।